I Leikanger har Digdir skapt ein unik arena for teknologiinteresserte studentar. 

Kvar sommar inviterer dei studentar til DigdirCamp, eit sommarjobbprogram som ikkje berre gir deltakarane verdifull erfaring, men som òg har vist seg å vere ei suksessoppskrift for rekruttering.

I år var det nær 140 studentar som kjempa om åtte sommarjobbstillingar.

– Det er rekord. Vi har aldri før hatt så mange søkarar som i år, fortel ein fornøgd Jørn Stenehjem i Digitaliseringsdirektoratet (Digdir).

Praktisk erfaring med reelle problemstillingar

Gjennom sommaren får studentane på DigdirCamp bryne seg på faktiske IT-oppgåver under rettleiing frå erfarne utviklarar. Oppgåvene varierer frå automatisering av tilgjengelegheitskontrollar på offentlege nettsider, til å finne løysingar for å integrere ID-porten med Internet og Things (IoT).

Studentane kjem frå fleire studiestadar, inkludert NTNU i Trondheim og Gjøvik, Oxford Brooks i England, samt universiteta i Bergen, Agder, Tromsø og Sørøst-Noreg. Dei jobbar i grupper og presenterer funna sine undervegs, noko som gir både fagleg utvikling og nyttig teamerfaring. Dette gjer dei betre rusta til å møte arbeidslivet – anten i Digdir eller ein annan stad.

DigdirCamparar i gong med å løyse oppgåver.

Frå sommarjobb til fast jobb

Stenehjem stadfestar at sommarcampen fungerer som ein effektiv rekrutteringskanal.

– Dei siste åra har vi rekruttert jamt ifrå campen. Både fordi folk har søkt seg til camp og blitt verande, men òg fordi vi har fått kontakt med lokale folk som er potensielle heimflyttarar og jobbsøkarar seinare. På campen får dei teste oss, og vi får teste dei.

Sidan oppstarten av DigdirCamp har fleire studentar gått rett frå sommarjobb til fast stilling. Ein av dei er Kristoffer Svedal, som deltok på DigdirCamp i 2023 og no er tilsett i teamet for kundetenester. Han fekk først kjennskap til Digdir gjennom eit «Heim til jul»-arrangement, vart oppmoda om å søke sommarjobben – og enda opp med fast jobb.

– Det verka som ein veldig flott arbeidsplass med kjekke kollegaer og interessante oppgåver. Eg hadde ikkje lenge att av utdanninga og gav uttrykk for at eg trengte jobb. Planen min var enten å jobbe i Bergen eller i Sogn, og sidan eg vart tilboden jobb hos Digdir, vart det her, fortel han.

I dag jobbar Svedal med API-ar og webgrensesnitt for administrasjon av tilgongar og integrasjonar til ID-porten, Ansattporten og Maskinporten, som er kritiske tenester i det offentlege Noreg. Han er også ein av dei tilsette som er med på å fasilitere sommarcampen for nye studentar – og forhåpentlegvis lokke enda fleire jobbsøkarar til Digdir i framtida.

DigdirCamparar på plass på Leikanger sommaren 2023. Kristoffer Svedal i midten bak. 

Ei investering i framtida

For Digdir handlar ikkje rekruttering berre om kompetansen, men om å finne dei rette folka.

– Når studentane er under utdanning har dei eit minimum av kompetanse og erfaring, så det handlar vel så mykje om personlegdom, interesser, at ein har lyst å bu og jobbe her, og at vi finn ein god match for begge sider, seier Stenehjem.

Til arbeidsgivarar som vurderer å tilsette sommarvikarar, vil han seie at det er verdt innsatsen. Digdir har funne fleksible løysingar for å sikre god oppfølging av sommarvikarane, mellom anna ved å bruke nytilsette som kanskje ikkje treng ferie midt på sommaren, eller ved å gi bonus til dei som forskyv ferien sin.

– Vi startar òg sommarvikarane tidleg, slik at dei får to-tre veker overlapp med fagansvarlege før dei tek ferie. Ei god onboarding og bevisst oppgåveval er avgjerande for at både studentane og vi som arbeidsgjevar skal få maksimalt utbytte, avsluttar han.

Klar for eit rekrutteringsløft?

Vil du styrke rekrutteringa i di verksemd? Kanskje ein sommarjobb kan vere første steget. No kan du delta i ei stor sommarjobbkampanje, Sommarjobb i Vest. Sjå korleis du blir med i kampanjen i lenka under. Det er enkelt og heilt gratis!

Kristoffer Svedal om kva som gjer Digdir til ein attraktiv arbeidsplass:

• Jobb med meining: Eit viktig og interessant samfunnsoppdrag i å levere fungerande digitale tenester til det offentlege Noreg.
• Utfordrande: I dette miljøet får ein mange ulike oppgåver å bryne seg på i løpet av ein dag.
• Omgjevnadane: Det er mykje flott natur i Sogndal og Leikanger, for dei som likar å nytte seg av det.

Vil du både tene pengar og makse ut opplevelsesbanken i sommar? Då må du sjekke ut Sognacamp.

Alle foto: Sogn Næring

Jobb på dagtid, eventyr på kveldstid

Sognacamp er ei unik sommaroppleving der du kombinerer ein spennande jobb med aktivitetar i verdas vakraste natur, og blir ein del av eit inkluderande fellesskap. I løpet av fem veker får du verdifull arbeidserfaring gjennom spennande sommarjobbar med lokale bedrifter, samstundes som du bur saman med andre studentar og får oppleve alt frå fjellturar og kajakkpadling til lokale festivalar.

Her får du med andre ord i både pose og (tur)sekk, ein unik inngang til arbeidslivet og regionen, og kanskje er det starten på eit langvarig forhold til Sogn?

Ein sommar som ser bra ut både på CV-en og på Instagram!

Henrik Skyttermoen er rådgjevar i Sogn Næring og primus motor for Sognacamp. Sjølv er han oppvaksen på austlandet, men har sidan blitt Sognefrelst og lever no livet i Sogndal med ski, fjell og jobb i skjønn harmoni. Vi har stilt han nokre spørsmål for å finne ut meir om Sognacamp.

Kven er Sognacamp for?

Sognacamp er for studentar eller dei som er i eit utdanningsløp som vil kombinere relevant arbeidserfaring med ei solid dose eventyr og spennande opplevingar. Det er for dei som likar å ha fjordutsikt til kaffikoppen om morgonen, utfordre seg sjølv både på arbeidsplassen og på fritida, og møte andre unge i same situasjon. Kort sagt: For deg som vil ha ein sommar som både ser bra ut på CV-en og på Instagram!

Kvifor skal unge velje Sognacamp i sommar?

Kvar sommar reiser tusenvis av nordmenn til Vestlandet og Sogn for å oppleve fjord, fjell og fantastiske naturopplevingar. No kan du ikkje berre feriere her – du kan bu her, tene pengar, og samtidig få jobberfaring som kan vere gull verd vidare i karrieren. Sognacamp gir deg det beste av begge verdenar: ein sommar fylt med eventyr, nye venskap og profesjonell utvikling.

Korleis vil du beskrive næringslivet og lokalmiljøet deltakarane får eit innblikk i?

Næringslivet i Sogn er ei spennande blanding av private bedrifter, statlege arbeidsplassar og kommunale tenester. Her kan du få erfaring frå alt frå innovative tech-startups og berekraftsbedrifter til viktige samfunnsroller innan offentleg sektor.

Mange av jobbane er innanfor energi, reiseliv, teknologi og offentleg administrasjon, så det finst noko for ei kvar interesse. Samtidig er ikkje Sogn berre ein plass du jobbar – det er ein plass du blir ein del av. Her helsar folk faktisk på deg på gata, og viss du ikkje møter opp på kaffimorgonen ved fjorden, kjem garantert nokon til å spørje kor du blei av. Så forbered deg på ein sommar der du ikkje berre får en jobb, men også ein liten, men meget engasjert heiagjeng på kjøpet!

Kva aktivitetar kan vi sjå fram til?

Sognacamp er full av opplevingar – både dei som gir puls og dei som senkar skuldrane. Vi startar sommaren med eit skikkeleg kick-off i Sogndal, der du blir kjent med gjengen og får ein smakebit på alt som ventar.

Gjennom campen kan du sjå fram til morgonbading og kaffi – perfekt for både morgonfuglar og dei som treng ein forfriskande dytt for å vakne. For dei som likar litt action blir det klatring på Kvam og bretur i Jostedalen. Likar du å konkurrere, kan du briljere på frisbeegolf på Kaupanger eller utfordre nokon til volleyball.

Om kvelden ventar mellom anna ein kveldstur til Molden, der du får sjå solnedgang som er verd kvar einaste høgdemeter. Og kva er vel ein sommar utan festivalar? Sognacamp tek deg med til både Bergtatt-festivalen og Fresenfestivalen, der du får musikk, stemning og kanskje ein allsong eller to.

Uansett om du er ein friluftsentusiast eller berre vil ha ein uforgløymeleg sommar, har vi noko for deg. Her får du oppleve Sogn på sitt beste – saman med ein gjeng du seint vil gløyme!

Til slutt: Dine beste tips for å få tidenes sommar i Sogn?

• Ver utforskande og open for å prøve alt!
• Test ut all den lokale sideren vi har!
• Gode sko, nok solkrem, badetøy og ein sekk til å bere alt i.

Høyrest det freistande ut? Då må du søke!

Og då er det fint å ha ein relevant sommarjobb å kome heim til.

Dette er ein artikkel om Sindre sin sommarjobb frå 2022.

Sindre Mulelid Hartvigsen (23) studerer for augeblikket master i bygg- og miljøteknikk på NTNU i Trondheim. Eit studie han syns er veldig interessant. Men når sommaren nærmar seg og dei siste eksamenane for semesteret er levert, vil han fort heim til vakre Nordfjord.

Og då er det fint å ha ein relevant sommarjobb å komme heim til. Så i ferien skal Sindre jobbe i produksjonen av prefabrikkerte betongelement i Stryn Betongelement, Førde Sement.

– Utdanninga mi er veldig bygg- og anleggsretta, og betong er jo eit av dei mest brukte materiala i bygg- og anleggsbransjen. Så eg tenkjer at det er lurt å byggje seg opp litt erfaring med korleis det faktisk vert produsert og brukt, seier Sindre.

Sindre har fått tilbod om å jobbe i Stryn Betongelement frå byrjinga av juni og fram til fellesferien startar omtrent midt i juli, for då held dei stengt. Men så skal han jobbe eit par veker igjen etter fellesferien, før semesterstart. Det blir altså ikkje jobbing heile sommaren, men han får oppfylt kravet fru NTNU om X antal veker med studierelevant arbeidserfaring som han må ha for å bestå studiet.

No er han klar for å endeleg få oppleve det praktiske ved utdanninga si.

– Eg gler meg til å få praktisk erfaring som supplement til det teoretiske. Under pandemien hadde vi eigentleg ein del ekskursjonar og opplegg planlagt for å få meir praktisk tilnærming til faga våre, men det vart jo ikkje noko av. Så vilja er desto større etter å få jobbe litt praktisk no.

Sindre har trua på at det å ha bygd seg opp litt erfaring rundt betongfaget gjennom ein slik sommarjobb vil kome godt med i utdanningsløpet.

– Eg får jo eit lite innblikk i korleis ei bedrift innan bygg- og anleggsbransjen fungerer. Dette trur eg vil kunne vere med på å stadfeste at eg har valt rett studieretning.

Otilia Sandal har sommarjobb på Astruptunet.

I spalta «Min sommarjobb» frå 2022 får du møte unge menneske som brukte sommaren på læring, utvikling og spennande prosjekt i Vestland.

Fortel i korte drag om jobben og kva den går ut på?

Eg jobbar som museumsvert på Astruptunet. Her fortel eg om kunstnaren Nikolai Astrup på omvising i dei gamle stovene, tar med besøkande i galleriet, i tillegg til å selje kaffi, vaflar og sveler i kafeen vår.

Dei besøkande er vanlege turistar frå innland og utland. I jobben vil eg vere den besten verten og informanten for desse som kjem.

Kva er det mest spennande med jobben?

Det er reaksjonane til dei besøkande på omvising. Sidan gjestane kjem frå alle moglege plassar og er i ulike aldrar, set dei pris på ulike gjenstandar og forteljingar. Nokre kjenner igjen ovnane her frå gamle hus heime, medan andre lar seg imponere over dei nokså unike sengeplassane i kjøkkenstova. Det er kjekt korleis ein kunstnar som eg likar, også engasjerer så mange andre – gjennom kunsten sin og livshistoria si.

Det er mange besøkande på tunet som lurer på om eg malar sjølv, men malinga har eg overlatt til Nikolai Astrup. I staden får eg møte mange forskjellige personar og vise fram verdas koselegaste plass.

Kva håpar du at du vil lære i løpet av arbeidsperioden?

Sidan eg allereie har jobba eit par somrar på Astruptunet, har eg allereie lært mykje. Eg har lært ekstremt mykje om Nikolai Astrup og livet på tunet. Men i tillegg lærer eg meg ‘å sjå’ den besøkande, ved å gjere meg oppmerksam på kva den enkelte interesserer seg for og kva ønskjer den har for sitt besøk.

Kva erfaringar vil du ha med deg vidare?

I både rolla som vert og som informant har eg fått, og skal få, mykje god øving i å formidle og prate med besøkande slik at dei vert like glad i tunet som meg. Dette er viktige erfaringar som eg tar med meg vidare.

Kvifor valde du å takke ja til akkurat denne jobben?

Allereie før eg jobba her, likte eg Astruptunet veldig godt. Å få tilbringe sommaren på ein koseleg plass, med ein imponerande historie, i lag med så utruleg mange kjekke folk er den beste sommarjobben ein kunne hatt.